Назарбаев: Қазақстан мен Ресей арасындағы ынтымақтастық дамып келеді
Мемлекет басшысы Нұрсұлтан Назарбаев Ресей Федерациясының Үкімет Төрағасы Дмитрий Медведевті қабылдады. Бұл туралы Ақорданың баспасөз қызметінен хабарлады.
Кездесу барысында сауда-экономикалық, энергетикалық және көлік-транзиттік салалардағы екіжақты ынтымақтастықтың басым бағыттары қаралып, интеграциялық құрылымдар аясындағы ықпалдастық мәселелері талқыланды.
Нұрсұлтан Назарбаев пен Дмитрий Медведев өңірлік және халықаралық күн тәртібіндегі өзекті жайттар туралы да сөз қозғады. Қазақстан Президенті біздің ел мен Ресейдің арасындағы ынтымақтастық толық сенім негізінде дамып жатқанын айтты.
«1 қаңтардан бастап біздің мемлекеттеріміз Еуразиялық экономикалық одақ аясында ықпалдасатын болады. Қазіргі кезде сауданың төмендегені айтылуда, бірақ ол ақшалай мәнге қатысты байқалып отыр, ал ынтымақтастықтың нақты көлемі өсіп, бірлескен кәсіпорындар дамып келеді. Баға конъюнктурасы жақсарған кезде көрсеткіштер де жақсы жағына қарай өзгеретін болады. Ортақ кедендік шекара, адамдар мен жүктердің еркін қозғалысы елдеріміз үшін зор игілік болып саналады», — деді мемлекет басшысы.
Нұрсұлтан Назарбаев Дмитрий Медведевтің осы сапары Қазақстан мен Ресейдің ынтымақтастығын одан әрі дамытуға септігін тигізетіндігіне сенім білдірді. Ресей Үкімет Төрағасы екі елдің арасындағы ынтымақтастықтың деңгейі өсіп келе жатқанына тоқталды.
«Біз шынымен де өте жақын серіктестерміз. Біздің алдымызда бастауында Сіз тұрған өте салиқалы интеграциялық жоба бар. Еуразиялық экономикалық одақтың келесі жылдан бастап жұмыс істейтіні өте маңызды. Осы сәтті пайдалана отырып, Сізді және достас Қазақстан халқын келе жатқан Тәуелсіздік мерекесімен құттықтауға рұқсат етіңіз», — деді Медведев.
Новости Казахстана
8
